7 ივნისს, საქართველოში ვიზიტის ფარგლებში, ბატონი ენტონი დე ლანოიმ, საერთაშორისო სავალუტო ფონდის (IMF) აღმასრულებელმა დირექტორმა, რომელიც 15 სხვა ქვეყანასთან ერთად წარმოადგენს საქართველოს IMF-ის დირექტორთა საბჭოში, ISET-ის მკვლევრების, სტუდენტების, მენეჯერებისა და საქართველოს ბანკის წარმომადგენლებთან შეხვედრისას ისაუბრა IMF-სა და მის თანამშრომლობაზე საქართველოსთან.
ბატონმა დელანოიმ ისაუბრა IMF-ზე, როგორც ინსტიტუტზე, მის ისტორიაზე, სტრუქტურაზე, ფუნქციებზე, ინსტრუმენტებსა და განვითარებაზე.
როგორც ბატონმა დე ლანოიმ ახსნა, IMF-ის საქმიანობა გულისხმობს მეთვალყურეობას, რაც იმას ნიშნავს, რომ IMF ასრულებს მისი წევრების ეკონომიკური, ფინანსური და გაცვლითი კურსის პოლიტიკის გლობალური მონიტორინგისა და ქვეყნების ეკონომიკური განვითარების კატალიზატორის ფუნქციას. IMF ტექნიკური მხარდაჭერით ხელს უწყობს ბენეფიციართა კომპეტენციის გაძლიერებასა და კვლევით ანალიზს. IMF, ასევე, გასცემს სესხებს საკუთარ ვალუტაში, რომელსაც Special Drawing Rights (SDR) ეწოდება და შეესაბამება 1.36 აშშ დოლარს. აღნიშნული სესხები გაიცემა სხვადასხვა ფინანსური დახმარებებისა თუ სხვა ფორმებით, როგორიცაა, მაგალითად, „პრევენციული და ლიკვიდური საკრედიტო ხაზები“, „გახანგრძლივებული საფონდო საშუალებები“, „სარეზერვო შეთანხმებები“, „სწრაფი საკრედიტო საშუალებები“ და სხვ. სესხის ტიპი დამოკიდებულია IMF-ის წევრების საჭიროებებზე, როგორ ფარავენ საგადახდო ბალანსს და რა კვოტა აქვთ ფონდში (მაგ. წევრების ხმის მიცემის უფლება და დაფინანსების კვოტები შეესაბამება მათ წვლილსა და ეკონომიკურ ვითარებას).
21-23 მაისს, ISET-ის კვლევითი ინსტიტუტის (ISET-PI) მკვლევარმა, დავით კეშელავამ მონაწილეობა მიიღო ევროპის ყოველწლიურ საგაზეთო კონგრესში, რომელიც ვენაში გაიმართა. კონგრესის თემა იყო „ოპტიმისტური ჟურნალისტიკა და ფეისბუქის კრიტიკა“. კონგრესის მთავარი აქცენტი იყო ის უმთავრესი შესაძლებლობები და გამოწვევები, რომელთა წინაშეცაა ყოველდღიური საგაზეთო მედია. თუმცა კონგრესის თემები სცდებოდა ზემოთ ხსენებულ დასახელებას.
საგაზეთო კონგრესის ორგანიზატორები იყვნენ ობერაუერ მედია და ნორბერტ კუპერი, გაზეთების დიზაინერი. კონგრესის მსვლელობისას სიტყვით გამოვიდა 38 სპიკერი ევროპის როგორც განვითარებული, ისე განვითარებადი ქვეყნებიდან (მათ შორის, საქართველოდან), რომელთაც დამსწრე 500-ზე მეტ ბლოგერსა და მედიის წარმომადგენელს წარუდგინეს 24 სხვადასხვა თემა.
22 მაისს ISET-ის კვლევითმა ინსტიტუტმა (ISET-PI) უმასპინძლა ფრანსუა პაშუს, საერთაშორისო სავალუტო ფონდის (IMF) წარმომადგენელს საქართველოში, რომელმაც წარმოადგინა IMF-ის 2017 წლის კავკასიისა და ცენტრალური აზიის რეგიონული ეკონომიკური მიმოხილვა. პრეზენტაციაზე გამოყოფილი იყო მსოფლიო და რეგიონული გარემოს სამი ძირითადი სფერო: მიმოხილვა, პოლიტიკის სამოქმედო გეგმა და პრიორიტეტები.
პრეზენტაციის დასაწყისში ბატონმა პაშუმ მიმოიხილა მსოფლიო და რეგიონული გარემოს ძირითადი ტენდენციები. მისი თქმით, IMF-ის პროგნოზით, 2017 წლის რეალური მშპ-ის ზრდა დაგეგმილზე მაღალი იქნება, ძირითადად აშშ-ის, ჩინეთის, რუსეთისა და განვითარებადი ბაზრების მაღალი ზრდის ხარჯზე.
როგორც ითქვა, მსოფლიო მშპ-ის ზრდასთან დაკავშირებული რისკები შემცირდა, მსოფლიო ფინანსურ სტაბილურობას კი ძირითადად განაპირობებს გამარტივებული ფისკალური და მონეტარული პოლიტიკა და შემცირებული საკრედიტო რისკები. IMF-ის პროგნოზით, ნავთობის ფასები მცირედით გაიზრდება, თუმცა უახლოეს მომავალში არ დაუბრუნდება წინა მაჩვენებელს. მეტიც, გასული წლის შემოდგომაზე დაფიქსირებული ზრდის შემდეგ, სასაქონლო ფასები თანდათანობით შემცირდება.
Our Partners
